Contoh Teks Dharma Wacana Basa Bali

 Conto teks Dharma Wecana

RAHINA SARASWATI 

            Suksma aturang titiang ring pengenter acara utawi ugrawakiya antuk galah sane kaicen. Bapak Kepala Sekolah, Bapak Ibu guru, Bapak Ibu panitia, Bapak Ibu Staff sekolah sane singgihing titiang, miwah pare semeton sane tresna asihin titiang. Ring rahinane mangkin titiang ngangganin kelas XII jagi maktayang dharmawacana.

            Sadurungne titiang mangatur-atur, ngiring sareng-sareng ngaturang parama suksma ring Ida Sanghyang Widhi Wasa. Duaning sangkaning pasuecan utawi asung kerta waranugraha Ida, iraga sareng sami presida mapupul deriki, ngelaksanayang acara penyambutan rahina Saraswati sane kalaksanayang ring pinanggal 10 rahina sukra watugunung sasih sadha, titiang nunas panglugrayang jagi ngaturang pangastungkara panganjali.

Om Swastiastu,

            Sane kapartama ngindikin napi nika rahina Saraswati? Inggih mawit napi sane kauningayang rahina Saraswati punika rahina sane kasuciang antuk umat Hindune sane di Bali. Ring rahina puniki para umat Hindune akeh sane ngalaksanayang pangabaktian, nunas mangda ngemolihang kaweruhan mangda sida kaanggen nabdabang jagat ring Sanghyang Aji Saraswati sane pinake silih sinunggil manipestasi Ida Sanghyang Widhi Wasa.

            Sane kapingkalih ngindikin karauhan rahina Saraswati. Inggih ida dane sareng sami, sakadi sane sampun kauningang rahnia Saraswati punika rauhnyane enem sasih apisan manut ring rahina saniscara umanis wuku watugunung. Sane maarti iraga ngalaksanayang rahina SARASWATI kapingkalih atiban. Punika mawinan rahina Saraswati niki kasorohang ring rahina sane manut pawukon miwah kasorohang yadnya sane manut ring Naimituka Yadnya- yadnya sane kalaksanayang sabilang rahina-rahina sane manut saking uger-uger-.

            Sane kapingtiga ngindikan sejarah rahina Saraswati. Makasami sane wenten ring mercepada puniki pastike madue sejarahnyane, ten ical rahina Saraswati puniki. Inggih ida dane sareng sami, sejarah rahina Saraswati punika kadulurung antuk Sanghyang Aji Saraswati sane kapralambangin marupa dewi sane jegeg. Kajegegan puniki pateh tekening ilmu pengetahuan sane madue taksu.

            Sane kapingpat ngindikin mawinan iraga ngelaksanayang rahina Saraswati. Inggih ida dane sareng sami, iraga dados jatma sane ‘papa’ utawi madue dosa ngelaksanayang rahina Saraswati puniki nenten je tiosan mawinan irage jagi ngaturang parama suksma majeng ring Sanghyang Aji Saraswati. Ngawitin antuk ilmu pengetahuan utawi kaweruhan  sane sampun kaice ring irage soang-soang.

            Sane kapinglima ngindikin mawinan iraga ngaturang suksma ring Sanghyang Aji Saraswati. Inggih ida dane sareng sami, sampun sapatutne irage ngaturang suksma ring Sanghyang Aji Saraswati mawinan ida sane ngicen irage sane ‘papa’ puniki kaweruhan. Yenning kapinehang, kaweruhan puniki sane marupa ‘bekel’ sane paling mangutama, mawinan tanpe kaweruhan irage nenten presida ngelaksanayang napi-napi. Inggih, pinehang malih. Napi sane kanggen mangkin ? Baju ? Jaler ? Kamen ? HP ? miwah sane lianan punika wenten lan irage mresida ngaryanang lan nganggen nenten ja tios karana kaweruhan sane kapaica olih Sanghyang Aji Saraswati.

            Sane kaping nenem ngindikin napi dadosne yening iraga nenten madue kaweruhan ? Inggih ida dane sareng sami, sadurung nyane pinehang napi dadosne pulpen sane nenten madaging tinta ? Kirang langkungne sapunika dadosne yening iraga nenten madue kaweruhan. Tanpe kaweruhan punika iragaboya je melahan tekening bedogol, nenten je melahan tekening siap sambehin injin, nenten je melahan tekening be sane paling ngalih yeh di telagane. Tanpe kaweruhan irage nenten mreside mapineh, nenten uning napi sane becik napi sane ten-becik, nenten uning napi sane manut napi sane iwang. Pasemetonan iraga aluh ka-adu domba, aluh bane anake mogboggin irage.

            Inggih ida dane sareng sami, wantah asapunika dharmawacana sane prasida baktayang titiang. Dumogi-dumadak napi sane aturang titiang wenten pikenehnyane.

            Inggih ida dane sareng sami, suksma aturang titiang antuk sane sampun kaice ring padewek titiang puniki, mawit uratian sane sampun kaice. Titiang nenten je jatma sane becik, sadadosne jatma sane papa pastika titiang wenten kirang langkung. Geng Rna pangampura tunas titiang antuk parilaksana lan pangatur-atur titiang sane nenten manut ring manah ida dane sareng sami. Dumogi-dumadak titiang lan ida dane sareng sami setate ngemolihang kerahajengan lan kerahayuan. Dharmawacana sane kabaktayang olih padewekan titiang kasineb antuk para shanti.

OM SHANTI, SHANTI, SHANTI OM.

*sumber dokumen dari guru sekolah*

tags : dharma wecana - dharma wacana basa bali